राष्ट्रपति र प्रधानमन्त्रीबीच भेटवार्ता

काठमाडौं । प्रधानमन्त्री केपी शर्मा ओलीले राष्ट्रपति रामचन्द्र पौडेलसँग भेटवार्ता गरेका छन् । शनिबार दिउँसो भेटवार्ता भएको थियो ।

प्रधानमन्त्री ओली राष्ट्रपतिलाई भेट्न उनको निवास शीतलनिवास पुगेका थिए ।

भेटवार्तामा भएका छलफलका विषयहरू भने खुलाइएको छैन ।

राष्ट्रपति पौडेलले दुवै सदनबाट पारित भएपछि प्रमाणीकरणका लागि आएको संवैधानिक परिषद् (काम, कर्तव्य, अधिकार र कार्यविधि) सम्बन्धी ऐन, २०६६ लाई संशोधन गर्न बनेको विधेयक’ प्रतिनिधिसभामा फिर्ता पठाएका थिए । उनले फिर्ता पठाएको विधेयक साउन १९ गते सोमबार प्रतिनिधिसभा बैठकमा पेस गर्ने तयारी छ ।

विधेयक पेश गर्नुअघि प्रधानमन्त्री ओलीले राष्ट्रपति पौडेलसँग गरेको भेटवार्तालाई अर्थपूर्ण रुपमा हेरिएको छ ।