बागमतीका मुख्यमन्त्रीले राजीनामा नदिने

काठमाडौं । नेपाली कांग्रेस बागमती प्रदेश संसदीय दल नेताको हैसियत गुमाएका मुख्यमन्त्री बहादुर सिं लामा तामाङले मुख्यमन्त्रीबाट राजीनामा नदिने बताएका छन् । आफूविरूद्ध मन्त्रीहरू र नेताहरूले प्रपञ्च गरेको आरोप लगाउँदै उनले राजीनामा नदिने बताएका हुन् ।

मंगलबार हेटौंडामा बसेको संसदीय दल बैठकमा दल नेता तामाङका पक्ष र विपक्षमा रहेका सांसदहरूको मतविभाजन गरिएको थियो ।

लामाका पक्षमा १५ जनाले मात्रै मत दिए भने सांसद ईन्द्रबहादुर बानियाँका पक्षमा २२ जना उभिए । बागमतीमा कांग्रेसका ३७ जना सांसद छन् ।

बागमती कांग्रेसमा अहिले संसदीय दल नेता रिक्त भएको अवस्था छ । त्यसका लागि भोलि निर्वाचन हुनेछ । मुख्यमन्त्री तामाङ नै दल नेता उठ्छन् कि उनको पक्षबाट अरू कोही सांसदलाई उम्मेदवार बनाउँछन् यकिन छैन । तर अर्को पक्षबाट भने ईन्द्र बानियाँ संसदीय दल नेताको प्रतिस्पर्धी हुन् ।

दल नेताको हैसियत गुमाएका मुख्यमन्त्री तामाङले मुख्यमन्त्रीबाट राजीनामा नदिने बताए । ‘मुख्यमन्त्री हुन दल नेता हुनुपर्छ भन्ने कानुनी व्यवस्था छैन,’ उनले भने, ‘अहिले दल नेता रिक्त भएको अवस्था छ, मुख्यमन्त्रीबाट भने म राजीनामा दिन्न।’ संसदीय दल र सरकार फरक विषय भएको उनले बताए । उनले गठबन्धन सरकार रहेको र मुख्यमन्त्री हुन दल नेता हुन आवश्यक नरहेको पनि बताए ।