धनुषामा किशाेरीकाे हत्या, दुई जना घाइते

काठमाडौं । धनुषाको जनकपुरधाम उपमहानगरपालिका–४ मा एक जनाको हृत्या भएको छ । दुईजना घाइते छन् ।

कटैयाचौरी भन्ने स्थानमा धनुषाको बटेश्वर गाउँपालिका– ५ शान्तिपुरका दिनेश यादवकी १४ वर्षीया छोरी अञ्चली यादवको हत्या भएको हो ।

अञ्चलीकी आमा ३६ वर्षीया आशा यादव र आशाकी भतिजी राधा यादव घाइते छन् ।

उनीहरुलाई उपचारका लागि प्रादेशिक अस्पताल जनकपुरमा भर्ना गरिएको छ ।

अञ्चली जनकपुरमा डेरा गरी आमासँग बसेर पढिरहेकी थिइन् ।

मधेश प्रदेश प्रहरी प्रमुख उमा चतुर्वेदीका अनुसार घटना गएराति ११ बजेतिर भएको हो । उनले घटनाको अनुसन्धान भइरहेको र धारिलो हतियार प्रहार गरी फरार भएका व्यक्तिको खोजी भइरहेको जानकारी दिए ।