मेची राजमार्ग र तमोर करिडोरसहित चार राजमार्ग अवरुद्ध

काठमाडौं । लगातारको वर्षा र पहिरोका कारण मेची राजमार्गसहित देशभरका ४ राजमार्ग अवरुद्ध भएको छ ।

पहिरोका कारण अरनिको राजमार्ग र मध्य पहाडी राजमार्ग अवरुद्ध भएको छ ।

लगातारको वर्षाका कारण बाढी आउँदा तमोर करिडोरको पाँचथर–धनकुटा र मेची राजमार्गको पाँचथर खण्ड अवरुद्ध भएको  हाे ।

बाढीका कारण मेची राजमार्गको पाँचथर खण्ड अन्तर्गत हेवा खोलाको बाढीले डाइभर्सनको सतह पार गरेपछि आइबार मध्यरातदेखि सडक अवरुद्ध भएको हो ।

तमोर करिडोरमा पर्ने नावा खोलामा बाढी आएपछि सडक अवरुद्ध भएको जिल्ला प्रहरी कार्यालय पाँचथरका सूचना अधिकारी रुपेश तामाङले जानकारी दिए ।

हेवा खोलामा भएको अवरोध पानीको सतह घटनासाथ डाइभर्सन मर्मत गरेर खुलाइने सडक डिभिजन इलामले जनाएको छ । सिन्धुपाल्चोक भोटेकोशी गाउँपालिका–२ कोदारीस्थित अरनिको राजमार्ग पनि पहिरोकै कारण अवरुद्ध भएको हो ।

जाजरकोट छेडागाड नगरपालिका–३ दंखेरी भिर गिट्टिखोलास्थित मध्य पहाडी राजमार्ग पूर्णरूपमा बन्द भएको छ । माथिबाट खसेको पहिरोका कारण सडक अवरुद्ध भएको प्रहरीले जनाएको छ ।