एक वर्षमा भित्रियो ८५ अर्ब ७४ करोडका सवारी

काठमाडौं । आर्थिक वर्ष २०८१–८२ मा नेपालमा ८५ अर्ब ७४ करोड ८३ लाख ४९ हजार रुपैयाँ बराबरको सवारी साधन र पार्टपुर्जा आयात भएको छ । भन्सार विभागको तथ्यांकअनुसार सो मूल्य बराबरका मोटरसाइकल, कार, जीप, बस, ट्रकदेखि टायर, इन्जिन, ब्याट्री र अन्य पार्टपुर्जा आयात भएका हुन् ।

यसमा विद्युतीय सवारी साधनको संख्यामा उल्लेख्य छ ।  आर्थिक वर्ष २०८१–८२ मा नेपालले सवारी साधन तथा पार्टपुर्जा आयात हुँदा सरकारले ५७ अर्ब ८९ करोड रुपैयाँ राजस्व उठाएको छ ।

भन्सार विभागको तथ्याङ्कअनुसार अघिल्लो आर्थिक वर्षको तुलनामा गत आर्थिक वर्ष २०८१–८२ मा विद्युतीय सवारी साधनको आयात थोरै मात्रै वृद्धि भएको छ । आर्थिक वर्ष २०८१–८२ को एक वर्षमा १३ हजार ५७८ युनिट ईभी गाडी नेपाल भित्रिएका छन् । ती सवारीको मूल्य ३१ अर्ब ७६ करोड रुपैयाँ छ ।

आर्थिक वर्ष २०८०–८१ मा २९ अर्ब ४७ करोड ४३ हजार रुपैयाँ बराबरको ११ हजार ७०१ युनिट विद्युतीय गाडी आयात भएको थियो ।

विद्युतीय सवारी साधनको आयातबाट सरकारले १९ अर्ब ७० करोड रुपैयाँ बराबरको राजस्व संकलन गरेको छ । अघिल्लो आर्थिक वर्ष १३ अर्ब ६० करोड ७३ लाख रुपैयाँ बराबरको राजस्व संकलन भएको थियो ।