पाँचथरमा बाँदर धपाउन कर्मचारी नियुक्त

फिदिम । बाँदर धपाउन पाँचथरको कुम्मायक गाउँपालिका–१ ले स्वयंसेवक कर्मचारी नियुक्त गरेको छ । वडा कार्यालयले बाँदर हेरालु कर्मचारी नियुक्त गरेको हो ।

कृषकको अन्नबाली जोगाउन तथा बाँदरको समस्या समाधानका लागि यसअघि विभिन्न उपाय अवलम्बन गरिएको थियो । तर, समस्याको समाधान नभएपछि हेरालु कर्मचारी नियुक्त गरिएको हो ।

वडाको बजेटबाट ९ वटा वडामा १ जनाका दरले ९ जना बाँदर हेरालु कर्मचारी नियुक्त गरिएको वडाध्यक्ष तथा गाउँपालिकाका प्रवक्ता देवेन्द्रकुमार लावतीले जानकारी दिए ।

बाँदर आतंकले किसानको उठिबास लाग्ने अवस्था आएपछि कृषकको मागका आधारमा स्वयंसेवक अर्थात बाँदर हेरालु कर्मचारी नियुक्त गरिएको वडा अध्यक्ष लावतीको भनाइ छ ।