थुनछेक बहसपछि जन्मकैदकाे फैसला

विराटनगर । ७ वर्षीया भतिजीको बलात्कारपछि हत्या आरोपमा पक्राउ परेका एक व्यक्तिलाई जिल्ला अदालत मोरङले बाँचुन्जेल कैद सजाय सुनाएको छ ।

मोरङको धनपालथान गाउँपालिका – ५ का २२ वर्षीय अनिष सरदारलाई थुनछेक बहसपछि जिल्ला अदालत मोरङले बाँचुन्जेलको कैद सजाय सुनाएको हो ।

उनले गत असार १४ गते राति भतिजी ७ वर्षीया आत्तिकाको जवरजस्ती करणीपछि हत्या गरी घरबाट करिब सय मिटर पर रहेको दुर्गा आधारभूत विद्यालयको बाटो छेउमा शव राखेका थिए ।

प्रहरी अनुसन्धान प्रतिवेदनका आधारमा सरकारी वकिल कार्यालयले आइतबार जिल्ला अदालत मोरङमा अनिषविरुद्ध मुद्दा दर्ता गरेको थियो । सोमबार बयानपछि थुनछेक बहस भएको थियो । थुनछेक बहसकै दिन न्यायाधीश बाबुराम सुवेदीको इजलासले अनिषलाई जन्मकैद (जीवित रहेसम्म) कैद सजाय हुने फैसला सुनाएको अदालतका स्रेस्तेदार मणिराम पोखरेलले जानकारी दिए ।

उनका अनुसार अदालतमा बयानका क्रममा आरोपीले कसुर स्वीकार गरेपछि थुनछेक बहस लगतै मुलुकी अपराध संहिताको दफा ४१ बमोजिम फैसला भएको हो । अदालतले अनिषलाई ७ लाख रूपैयाँ जरिबाना र मृतकका परिवारलाई क्षतिपूर्तिबापत १ लाख रूपैयाँ भराउने फैसला पनि गरेकाे छ ।