जसपाले समर्थन फिर्ता लिदा गुम्याे सरकारकाे दुई तिहाइ बहुमत, राष्ट्रियसभामा अल्पमत

काठमाडौं । भूमि विधेयकप्रति असन्तुष्टि जनाउदै जनता समाजवादी पार्टी (जसपा) नेपालले सरकारलाई दिएको समर्थन फिर्ता लिएपछि वर्तमान सरकारकाे दुई तिहाइ बहुमत गुमेकाे छ ।

बुधबार बसेको संसदीय दल बैठकले सरकारलाई दिएको समर्थन फिर्ता लिएको हो । जसपाले समर्थन फिर्ता लिएपछि सरकारको दुई तिहाइ गुमेको छ । राष्ट्रियसभामा सत्तापक्ष अल्पमतमा परेको छ ।

केपी शर्मा ओली प्रधानमन्त्री नियुक्त हुँदा नेपाली कांग्रेस, नेकपा एमाले सहित ७ राजनीतिक दलका १८८ जना सांसदले समर्थन दिएका थिए । यो प्रतिनिधिसभाको दुई तिहाइ हो ।

तर, जसपा नेपाल र नागरिक उन्मुक्ति पार्टीले समर्थन फिर्ता लिएपछि दुई तिहाइ बहुमत गुमेको हो ।

३ सांसद रहेको जसपा नेपालको साथ नपाउँदा यसअघि नै सत्तारुढ दल राष्ट्रिय सभामा अल्पमतमा परेको थियो ।

५९ सदस्यीय राष्ट्रिय सभामा कांग्रेससँग १६ र एमालेसँग ११ सिट मात्र छ । सरकारमा रहेको अर्को दल लोसपासँग एक सिट छ ।

विपक्षमा रहेको माओवादी केन्द्रसँग १७, एकीकृत समाजवादीसँग ८, जसपा नेपालसँग ३ र राष्ट्रिय जनमोर्चासँग एक सिट छ ।