नाबालिकाको डिम्ब बिक्रीको विषय अनुसन्धान गर्दै प्रहरी

काठमाडौं । दुई जना नाबालिकाको डिम्ब बिक्री गरेको घटना बाहिर आएपछि प्रहरीले अनुसन्धान सुुरु गरेको छ । नेपाल प्रहरीको केन्द्रीय अनुसन्धान ब्युरो (सिआइबी) ले अनुसन्धान सुरु गरेको हो ।

सिआइबीले काठमाडौंको बबरमहलमा रहेको होप फर्टिलिटी एन्ड डायगोनिस्टिक प्रालिका चिकित्सकसहित ५ जनामाथि अनुसन्धान गरिरहेको छ ।

सिआइबी प्रवक्ता एसपी युवराज खड्काका अनुसार दुई जना नाबालिकाका अभिभावकले डिम्ब बिक्री गरेको भनेर जाहेरी दिएका छन् ।

बालबालिका सम्बन्धी ऐन २०७५ को दफा ६६ को (थ) अनुसार सिआइबीले अनुसन्धान गरिरहेको एसपी खड्काले बताए। ‘औषधि वा अन्य कुनै परीक्षणको लागि बालबालिकालाई प्रयोग गरेको’ कसुरमा सिआइबीले अनुसन्धान गरिरहेको हो ।

प्रहरी स्रोतका अनुसार ती बालिकालाई कम्पनीले प्रतिव्‍यक्ति १० हजार रूपैयाँ दिएर डिम्ब झिकिएको थियो। बालिकाको परिवारले थाहा पाएर प्रहरीमा उजुरी दिएका थिए ।