दमकमा बालक मृत भेटिए

विराटनगर । झापाको दमकमा हराइरहेका बालक मृत फेला परेका छन् । दमक नगरपालिका–९ का सुमन धिमालका छोरा ११ वर्षीय रमन धिमाल मृत फेला परेका हुन् ।

रमन साथीहरुसँग खेल्न जान्छु भनेर सोमबार घरबाट हिँडेका थिए । फर्किएर नआएपछि आफन्तले खोजी गर्ने क्रममा मंगलबार बिहान दमक–९ सानुअर्ना खाडीस्थित बेतेनी र भुत्रे खोलाको दोभानमा मृत फेला परेको प्रहरीले जनाएको छ ।

प्रहरीका अनुसार घरदेखि करिब ९ सय मिटर पश्चिमको खोलामा डुबेर मृत्यु भएको अवस्थामा शव फेला परेको हो ।

दमक अस्पतालमा पोस्टमार्टम गरेर शव अभिभावकलाई जिम्मा लगाइएको छ ।