माेरङकाे कटहरीमा एक ट्रक गाँजा बरामद

विराटनगर । माेरङकाे कटहरीमा बन्दकोपी लोड गरिएको ट्रकमा ३ हजार १ सय ५० किलो गाँजा बरामद भएको छ । शनिबार राति मोरङको कटहरी गाउँपालिका–३ कटहरी चोकबाट प्रहरीले बन्दाकोपी लोड गरिएको ट्रकमा ३ हजार १ सय ५० किलो गाँजा बरामद गरेको हो ।

प्रहरी चौकी कटहरीबाट खटिएको प्रहरी टोलीले राति करिब १२ बजे भारत तर्फ जादै गरेको को १ ख ४५१८ नम्बरको ट्रकमा गाँजा बरामद गरेको हो ।

मोरङ प्रहरी प्रवक्ता डीएसपी कोपिला चुँडालका अनुसार ट्रकमा १ सय ५ बोरा गाँजा फेला परेको थियो । त्यो बोरा तौल गर्दा ३ हजार १५० किलो गाँजा बरामद भएको थियो । ट्रकमा २५–१६ बाेरा बन्दाकाेपी पनि बरामद भएकाे छ । ‘बन्दाकाेपीकाे बाेराले कभर गरेर ल्याउँदै गरेकाे अवस्थामा गाँजा बरामद भएकाे हाे,’ उनले भनिन्,’कहाँबाट ल्याइदैथियाे भन्ने खुलेकाे छैन ।’

प्रहरीलाई देखेपछि बन्दकोपीको बोरा लोड गरिएको ट्रक छाडेर चालक भागेका थिए । प्रहरीले खोजी गर्दा कोपीको बोराले छोपेको अवस्थामा गाँजाको बोरा फेला परेको थियो ।

धनकुटा भाेजपुरलगायत पहाडी जिल्लामा उत्पादन हुने गाँजा अवैध बाटाे हुँदै भारत पुग्ने गरेकाे छ । प्रहरीका अनुसार याे गाँजा पनि भारत तर्फ लगिदैथियाे ।

मोरङबाट एकैपटक ठूलो परिमाणमा गाँजा बरामद भएको यो पहिलो घटना भएकाे प्रहरीकाे दाबी छ । गत असार २५ गते धनपालथान गाउँपालिका–१ गदिया खोलानजिकै उखुबारीबाट ८ सय २ किलो गाँजा बरामद भएको थियो ।