नवराज सुवेदीलाई जिम्मेवारीबाट हटाएपछि राप्रपामा विवाद

काठमाडौं । राप्रपा अध्यक्ष राजेन्द्र लिङ्देनले अनुशासन समितिको अध्यक्ष पदबाट नवराज सुवेदीलाई हटाएपछि विवाद सुरु भएकाे छ ।

सुवेदी हिन्दुराष्ट्र र राजसंस्था पुनर्स्थापनाका लागि संयुक्त जनआन्दोलन समितिका संयोजक हुन् । उनकाे नेतृत्वमा राजावादी समूहले आन्दोलन गर्दै आएको छ । असार २५ गते लिङ्देनले सुवेदीलाई हटाएपछि विवाद बढेको हो ।

लिङ्देनको  कदमले राजावादी आन्दोलनमा प्रश्न उठेको राप्रपा इतर समूहको भनाइ छ ।

राप्रपाको इतर समूहको शनिबार भएको भेलाले अध्यक्षले विधान विपरीत सुवेदीलाई हटाएको निष्कर्ष निकाल्दै आइतबार बिहान साढे ११ बजे निर्वाचन आयोगमा उजुरी दिने निर्णय गरेको थियो ।

लिङ्देनले सुवेदीलाई हटाएर पार्टी उपाध्यक्ष रोशन कार्कीलाई जिम्मेवारी दिएका थिए । प्रवक्ता सगुन लावतीलाई पनि हटाएर थिए । लिङ्देनले इतर समूहका धवलशमशेर राणालाई समेत सङ्गठन विभाग प्रमुखबाट हटाएका थिए ।

लिङ्देनले मनोमानी गर्न थालेपछि महामन्त्री धवलशमशेर राणाको राजधानीस्थित अपार्टमेन्टमा शनिबार असन्तुष्ट समूहको भेला भएको थियो ।