ससुरालीमा चार जनाको हत्यापछि प्रहरीलाई खबर,‘ मलाई समात्न आउनू’

विराटनगर । भोजपुरमा एक व्यक्तिले ससुराली घर पुगेर श्रीमतीसहित चार जनाको हत्या गरेका छन् । भोजपुर नगरपालिका २ हेलौछा बस्ने राजेन्द्र राईले रामप्रसाद राई गाउँपालिका–२ धोदलेखानी पुगेर श्रीमती, सासु, ससुरा र सालोको हत्या गरेका हुन् ।

शनिबार राति हत्या गरेका उनले हत्यापछि प्रहरीलाई मलाई समात्न आउनु भन्दै खबर गरेका थिए ।

जिल्ला प्रहरी कार्यालय भोजपुरका इन्सपेक्टर दीपक श्रेष्ठका अनुसार राई आफैंले शनिबार राति सवा १ बजे प्रहरी कन्ट्रोल रुममा फोन गरेर ‘ममाथि चक्कु प्रहार भएकाले मैले मान्छे मारें, मलाई पक्राउ गर्न आउनुस्’ भनेर फोन गरेका थिए ।

त्यसपछि अस्थायी प्रहरी चौकी ओख्रेबाट प्रहरी सहायक निरीक्षक अशोककुमार खवास र जिल्ला प्रहरी कार्यालय भोजपुरबाट हबल्दार नेतृत्वको टोली परिचालित भएको थियो ।

घटनास्थल रामप्रसाद राई गाउँपालिका–२ धोदलेखानीमा प्रहरी पुग्दा राजेन्द्र राईका ससुरा ६८ वर्षीय बेलबहादुर गिरी, सासु मन्जु गिरी र उनका श्रीमती र सालोको शव एउटै कोठामा फेला परेको थियो ।

श्रीमती र सालो ‘अन्डर एज’ भएको भन्दै नाम भने खुलाएको छैन । श्रीमती १५ वर्ष र सालो १० वर्षका छन् ।

राजेन्द्र राईलाई प्रहरीले रामप्रसाद राई गाउँपालिका वडा नम्बर १ हर्बुभञ्ज्याङ भन्ने ठाउँमा घाइते अवस्थामा फेला पारेर प्रहरीले नियन्त्रणमा लिएको छ । उनको पेटमा चोट छ । उनको जिल्ला अस्पताल भोजपुरमा उपचार भइरहेको छ ।

प्रारम्भीक अनुसन्धानका क्रममा उनले शनिबार राति सासु आमाले चक्कुले हानेपछि चार जनाको हत्या गरेको प्रारम्भिक बयान दिएका छन् । उनको एक वर्षअघि प्रेम विवाह भएको थियो ।