झापामा कुटपिटबाट दुई बालकको मृत्यु

विराटनगर । झापाको शिवसताक्षी नगरपालिका– ९ का कुटपिटबाट दुई युवकको मृत्यु भएको छ । संगम चोकका १५ वर्षीय आदित्य तामाङ र रोमन थापा थापाको मृत्यु भएको हो ।

केही दिनअघि ट्युसन पढेर घर फर्कने क्रममा दुधेको ‌ध्रुवतारा अंग्रेजी माध्यमिक विद्यालयका केही विद्यार्थीहरूले उनीहरुमाथि कुटपिट गरेका थिए ।

प्रत्यक्षदर्शी विद्यार्थीका अनुसार पहिलोपटक सामान्य कुटपिट गरेपछि ‘जा’ भनेर पठाएका थिए। तर, केही समयपछि पुनः बोलाएर सोही समूहले कुटपिट गरेको थियो ।

कुटपिटपछि आदित्यले परिवारमा घटनाबारे जानकारी गराएका थिएनन् । त्यसैले उनी अस्पताल जान ढिला भएको थियो । कुटपिट भएको भोलि पल्ट उनलाई बिएन्डसी अस्पताल लगिएको थियो । बुधबार दिउँसो उपचारकै क्रममा उनको सोही अस्पतालमा निधन भएको हो । उनलाई गत शुक्रबार दिउँसो उपचारका लागि अस्पताल लगिएको थियो।

कुटपिट घटनामा संलग्न भएको आशंकामा स्थानीय प्रहरीले हालसम्म ६ जना किशोरलाई नियन्त्रणमा लिएको छ ।

आदित्यका मिल्ने साथी रोमन थापाको पनि आइतबार बिर्तामोडको बिर्ता सिटी अस्पतालमा मृत्यु भएको थियो । रोमन पनि सोही ट्युसन सेन्टरमा आउँथे र आदित्यसँगै देखिन्थे । उनीमाथि पनि कुटपिट भएको बताइएको छ ।

दुवै मृतक परिवारले घटनाको निष्पक्ष छानबिन गरी दोषीमाथि कडा कानुनी कारबाही गर्न माग गरेका छन् ।