मामाघरबाट घर फर्किएका युवक मृत भेटिए

धनकुटा । मामाघर झापाबाट आफ्नो घरतिर फर्किएका भोजपुर १ जना युवा धनकुटामा मृत फेला परेका छन् ।

भोजपुरको अरुण गाउँपालिका–७ का २७ वर्षीय सागर थापा मृत फेला परेका हुन् ।

धनकुटा प्रहरीका प्रवक्ता डीएसपी ओमप्रकाश खनालका अनुसार झापास्थित मावली घरबाट गत सोमबार भोजपुर आफ्नो घर फर्किएका थिए ।

घर नपुगेपछि परिवारका सदस्य र आफन्तले खोजी थालेका थिए । खोजी गर्ने क्रममा धनकुटाको पाख्रीबास नगरपालिका–५ रुपाटारस्थित खेतमा घोप्टो परेको अवस्थामा मंगलबार साँझ शव फेला परेको डीएसपी खनालले बताए ।

सागरको मृत्युको कारण यकिन भइसकेको छैन । शवलाई पोस्टमार्टमका लागि जिल्ला अस्पताल धनकुटामा राखिएको छ । घटनाको थप अनुसन्धान भइरहेको प्रहरीले जनाएको छ ।