कुलिङ पिरियडमा भएको चलखेल छानविन गर्न माओवादीको माग

काठमाडौं । संघीय निजामति ऐनमा रहेको कुलिङ पिरियडको व्यवस्थाबारे भएको चलखेलको विषयमा छानविन गर्न नेकपा माओवादी केन्द्रका उपमहासचिव जनार्दन शर्माले माग गरेका छन् ।

यो कार्य गम्भीर अपराध भएको उल्लेख गर्दै उनले छानबिन गरी दोषीलाई कारबाही गर्न माग गरेका हुन् ।

मंगलबार संसद भवन परिसरमा पत्रकारहरूसँग कुरा गर्दै शर्माले राज्य व्यवस्था समितिले पारित गरेकोभन्दा फरक शब्दहरू ऐनमा राखिएको भन्दै यसमा नियतवश हेरफेर गरिएको दाबी गरे। ‘यसमा समितिले पास गरेकोभन्दा बाहिर गएर गरिएको भन्नेमा सबै सदस्यहरूको एउटै धारणा छ,’ उनले भने, ‘सभापतिले पनि मलाई थाहा नभएको कुरा हो भन्नुभएको छ। सचिवले स्वाभाविक रूपमा लेखेको भन्नुभएको छ तर यस्ता कुराहरू स्वाभाविक हुँदैनन्।’

शर्माले यो कार्य संसदको सार्वभौम अधिकारमाथिको हस्तक्षेप भएको भन्दै कडा शब्दमा आलोचना गरे । ‘यो संसदलाई उपहार दिने नाममा गरिएको षड्यन्त्र र बदमासी हो। यो अत्यन्तै निच र तुच्छ कार्य हो,’ उनले भने, ‘यसको छानबिन हुनैपर्छ। सभापति, सचिव वा समिति—जसको गल्ती हो, उसले जिम्मेवारी लिनुपर्छ।’

विधेयकको ‘कुलिङ पिरियड’ सम्बन्धी व्यवस्थाले पूर्वसचिव, पूर्वप्रमुख सचिव वा अन्य उच्चपदस्थ कर्मचारीलाई अवकाशपश्चात् तत्काल कुनै नियुक्तिमा नबस्न बाध्य बनाउने उद्देश्य राखिएको थियो । दुई वर्ष नियुक्ति लिन नपाउने प्रावधानविरुद्ध सुटुक्क ‘बाहेक’ शब्दले थपेर उच्च पदस्थ कर्मचारीकाे नियुक्तिकाे बाटाे खुला गरेकाे थियाे ।