माेरङ कारागारमा कैदीकाे मृत्यु

काठमाडाैं । जिल्ला कारागार मोरङमा लागुऔषध मुद्दाका १ जना कैदीको मृत्यु भएको छ । लागुऔषध मुद्दामा दोषी ठहर भएर सजाय भुक्तान गरिरहेका मोरङको सुनवर्षी नगरपालिका–२ का २४ वर्षीय उमेश दर्जीको मृत्यु भएको हाे ।

कारागारका जेलर गौरव ढुंगेलका अनुसार दर्जीको उपचारका क्रममा मोरङको बुढीगंगास्थित विराट शिक्षण अस्पतालमा मंगलबार साँझ मृत्यु भएको हो ।

ज्वरो आउने र खुट्टा सुन्निने समस्या भएपछि दर्जीलाई उपचारका लागि गत जेठ ३० गते कोशी अस्पताल भर्ना गरिएको थियो । कोशीमा सम्भव नभएपछि थप उपचारका लागि असार ३ गते विराट शिक्षण अस्पताल लगिएको ढुंगेलले बताए ।

लागुऔषध मुद्दामा कसुरदार ठहर भएका दर्जी २०८१ पुस ४ गतेदेखि कारागारमा थिए । उनलाई जिल्ला अदालत मोरङले ५ वर्ष २ महिना कैद र ७ हजार रूपैयाँ जरिबाना हुने फैसला गरेको थियो ।