दाहसंस्कारको तयारी भइरहेका बेला प्रहरीले लग्यो बालिकाको शव

विराटनगर । संखुवासभामा दाहसंस्कारको तयारी भइरहेका बेला प्रहरीले बालिकाको शव नियन्त्रणमा लिएको छ । भोटखोला गाउँपालिका–४ की ६ वर्षीया युनिका तामाङको शव नियन्त्रणमा लिएको हो । प्रहरीले अभिभावकलाई समेत पक्राउ गरेको छ ।

संखुवासभा प्रहरीका सूचना अधिकारी, इन्स्पेक्टर अभिषेक श्रेष्ठका अनुसार बालिकाका बुवा गोपाल तामाङ र काकी कल्पना तामाङलाई नियन्त्रणमा लिइएको छ । बालिकाको शवलाई जिल्ला अस्पताल खाँदबारीको शवगृहमा राखिएको छ ।

गत वैशाख ३० गते गोपाल र उनकी भाइबुहारी कल्पनाबीच घरायसी विवादमा झगडा भएको थियो । त्यस क्रममा कल्पनाले भतिजी युनिकालाई डिलबाट धकेलेर लडाएको सूचना आएपछि बालिकाको शव नियन्त्रणमा लिएको प्रहरीले बताएको छ ।

त्यसबेला लडेर घाइते भएकी युनिकालाई उपचारका लागि विराटनगरस्थित नोबेल शिक्षण अस्पतालमा भर्ना गरिएको थियो । उपचारकै क्रममा बालिकाको बुधबार मृत्यु भएको थियो । मृत्यु भएपछि अभिभावकले शव दाहसंस्कारका लागि घरतिर लिएर जाँदै थिए । घर लैजाँदै गर्दा प्रहरीले शवसहित बालिकाका बुवा र कार्कीलाई नियन्त्रणमा लिएर अनुसन्धान सुरु गरेको छ ।