यो वर्ष सरदरभन्दा बढी वर्षाको सम्भावना

काठमाडौं । यो वर्ष सरदरभन्दा बढी वर्षा र गर्मी हुने सम्भावना अनुमान गरिएको छ । यस वर्षको मनसुन अवधिमा नेपालका हिमाली जिल्लाहरूमा सरदरभन्दा बढी वर्षाको सम्भावना गरिएको हो । हिउँ पर्ने ठाउँमा वर्षा र गर्मी सरदरभन्दा बढी हुने संकेतलाई विज्ञहरूले चिन्ताजनक मानेका छन् ।

जल तथा मौसम विज्ञान विभागले सार्वजनिक गरेको २०८२ सालको मनसुन प्रक्षेपण नक्सामा मधेश प्रदेशका केही भूभागमा मात्र सरदर वर्षा हुने अनुमान छ । सरदरलाई हरियो रंगले संकेत गरिएको छ । तर, पूर्वदेखि पश्चिमसम्मका अरू सबै भूभागमा हल्का नीलो र गाढा नीलो रंग देखिन्छ । यसले ती क्षेत्रमा सरदरभन्दा बढी वर्षा हुने सम्भावना रहेको संकेत गरेको छ ।

जल तथा मौसम विज्ञान विभागका महानिर्देशक कमलराम जोशीका अनुसार सरदरभन्दा बढी वर्षा हुने सम्भावना हिमाल पारीका जिल्ला मनाङ र मुस्ताङमा समेत देखिनु चिन्ताजनक विषय हो ।

नेपालको भौगोलिक बनावट अनुसार हिमाली र पहाडी क्षेत्रबाट पर्ने पानी बगेर तल झर्ने भएकाले त्यसले तराईमा उच्च जोखिमको सम्भावना देखाएको छ ।

विज्ञहरूका अनुसार हिमाली क्षेत्र जलवायु परिवर्तनको असर छ । हिउँ पर्ने ठाउँमा पानी पर्ने र तापक्रम वृद्धिको असरले जमिनमा हिउँ रहिरहने अवधि घट्ने र हिमताल र पोखरीहरू फुट्ने जोखिम हुन्छ । २०८२ सालको मनसुन प्रक्षेपणले नेपालको हिमाली क्षेत्र झन् बढी जोखिममा पर्ने सम्भावना देखिनु चिन्ताजनक भएको भूगर्भविद डा बसन्तराज अधिकारीले बताएका छन् ।