गभर्नर पौडेलले सम्हाले कार्यभार, पहिलाे निर्णय नयाँ नाेट छाप्ने

काठमाडौं । नवनियुक्त गभर्नर प्राडा विश्वनाथ पौडेलले नेपाल राष्ट्र बैंक पुगेर पदभार ग्रहण गरेका छन् ।

प्रधानन्यायाधीश प्रकाशमान सिंह राउतबाट शपथग्रहण लगत्तै बालुवाटारस्थित राष्ट्र बैंकको कार्यालय पुगेर गभर्नर पौडेलले पदभार ग्रहण गरेका हुन् ।

उनी नेपालको १८ औं गभर्नर हुन् ।

मंगलबार बिहान बसेको गभर्नर सिफारिस समितिको बैठकले गरेको सिफारिसअनुसार मंगलबार नै बसेको मन्त्रिपरिषद् बैठकले उनलाई केन्द्रीय बैंकको जिम्मेवारी दिने निर्णय गरेको थियो ।

पदभार ग्रहणपछि उनले पाँच सय र १ हजारका नयाँ नोट छपाई गर्ने निर्णयमा पहिलाे हस्ताक्षर गरे ।

पदभार ग्रहणपछि उनले मौद्रिक नीति र वित्त नीति अलग विषय रहेको बताए ।  ‘मौद्रिक नीति सरकारको वित्त नीतिको सहायक होइन, यो छुट्टै स्वतन्त्र नीति हो,’ उनले भने,’ सरकारको वित्त नीति कार्यान्वयनमा मौद्रिक नीतिले केही अवरोध गरेको छ भने यसलाई परिमार्जन गर्दै जानेछौं ।’