आन्दोलन र अपराध काेशीकाे सुरक्षा चुनौती

विराटनगर । कोशी प्रदेशमा पहिचान र व्यवस्थाविरुद्ध हुने गरेको आन्दोलनले सुरक्षा चुनौती थपेको छ ।

गृहमन्त्री रमेश लेखक र तीन वटै सुरक्षा निकायका प्रमुखहरूको उपस्थितिमा विराटनगरमा बुधबार दिनभर भएको प्रदेशस्तरीय सुरक्षा बैठकमा पहिचानको मुद्दा र व्यवस्थाविरुद्ध आन्दोलनले यहाँको शान्ति सुरक्षामा चुनौती थपेको निष्कर्ष निकालेको हो । प्रदेशको शान्ति सुरक्षाका लागि सचेत रहनुपर्ने सुरक्षा निकायका प्रमुखहरूले ब्रिफिङ गरेका छन् ।

‘ताप्लेजुङमा केबलकार बनाउनु हुन्न भन्ने वा त्यसलाई एक ढंगले लिनुपर्छ भन्ने कुरा पनि उठेका छन्,’ गृहमन्त्री लेखकले भने, ‘पूर्वराजावादीहरूले फेरि राजतन्त्र ल्याउने भनेर गरिरहेका गतिविधिहरूको पनि समीक्षा भएको छ ।’

संविधान र व्यवस्थाविरोधी गतिविधिलाई राजनीतिक रूपले पनि सामना गर्नुपर्ने र यसलाई प्रशासनिक हिसाबले पनि संविधानको रक्षा गर्ने, व्यवस्थाको रक्षा गर्ने काममा सरकार लाग्नुपर्ने निष्कर्ष निकालिएको उनले बताए ।

प्रत्येक जिल्लाको सुरक्षाको ब्रिफिङ पनि प्रमुख जिल्ला अधिकारीले नै गृहमन्त्रीसहित सुरक्षा निकायका प्रमुखहरूलाई ब्रिफिङ गरेका थिए ।

पहिचान र व्यवस्थाविरुद्ध आन्दोलनबाहेक झापा, मोरङ र सुनसरी तराईका जिल्लामा हुने गरेको सीमावर्ती अपराधका घटनाले पनि सुरक्षा चुनौती थपिएको बैठकले निष्कर्ष निकालेको छ । लागुऔषध, सडक दुर्घटना, आत्महत्या, साइबर क्राइमलगायतको विषयमा छलफल भएको हो ।