२५६९ औँ बुद्ध जयन्ती आज

काठमाडौं । शान्तिका अग्रदूत गौतम बुद्धको २५६९ औँ जन्म जयन्ती आज नेपालसहित विश्वका विभिन्न मुलुकमा मनाइँदैछ ।

प्रत्येक वर्ष वैशाख शुक्ल पूर्णिमाका दिन बुद्ध जयन्ती मनाइन्छ । २५६९ वर्षअघि कपिलवस्तु जिल्लास्थित तिलौराकोटमा राजा शुद्धोधन र रानी मायादेवीको कोखबाट सिद्धार्थ गौतमको जन्म भएको थियो । तीनै राजकुमार सिद्धार्थ ज्ञानको खोजीमा दरबार छाडेर हिँडेको केही वर्षपछि गौतम बुद्ध बनेका थिए । अहिंसा परमोधर्म भन्ने बुद्धको सन्देश आज विश्वभर फैलिएको छ ।

विश्व शान्ति स्थापनाका लागि पुर्‍याएको योगदानको स्मरणस्वरूप यो पर्व मनाउने गरिएको हो। बुद्धलाई भगवान् विष्णुको नवौँ अवतारका रूपमा पूजा आराधना गर्ने गरिन्छ ।

बुद्ध जन्मजयन्तीका अवसरमा सरकारले आज सार्वजनिक बिदा दिएको छ।

बुद्धका सबै शिक्षा र उपदेशको संग्रहलाई त्रिपिटक भनिन्छ । गौतम बुद्धलाई एसियाका तारा पनि भनिन्छ । शान्तिका अग्रदूत गौतम बुद्धका अनुयायी आज विश्वभर करोडौंको संख्यामा फैलिएका छन् । नेपालसहित चीन, भारत, सिंगापुर, भियतनाम, कम्बोडिया, थाइल्यान्ड, मलेसिया, श्रीलंका, मलेसिया, कोरिया, जापान, लाओस्, इन्डोनेसियालगायतका देशमा यो जयन्ती मनाइने गरिन्छ ।