ग्रामथान, दमक र दुहबीमा दुर्घटना हुँदा ३ जनाको मृत्यु

विराटनगर । मोरङको ग्रामथान गाउँपालिका २, झापाको दमक नगरपालिका– १ र सुनसरीको दुहबी नगरपालिका– ३ मा सवारी दुर्घटना हुँदा तीन जनाको मृत्यु भएको छ । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, इटहरीका अनुसार शनिबार भएकाे छुट्टाछुट्टै दुर्घटना तीन जनाकाे मृत्यु भएकाे हाे ।

दमकमा ट्रकको ठक्करबाट स्कुटर चालकको मृत्यु भएको छ । दमकको रबि स्टेण्ड गेट नजिकै बेलडाँगीबाट दमकतर्फ आउँदै गरेको ग १ ख ६४३७ नम्बरको ट्रकले फाल्गुनन्द चोकबाट बेलडाँगी तर्फ जाँदै गरेको मे ८ प ४५५८ नम्बरको स्कुटरलाई ठक्कर दिएको थियो । दुर्घटनामा स्कुटर चालक ताप्लेजुङको दोभान बस्ने २२ वर्षीय अंकीत लिम्बुको घटनास्थलमै मृत्यु भएको हो । स्कुटर पछाडी सवार पाचँथरको मिक्लाजुङ गाउँपालिका– ४ की ४२ वर्षीया सृजना राई गम्भीर घाइते भएकी छन् । उनको बिएण्डसी अस्पताल विर्तामोडमा उपचार भइरहेको छ । ट्रक चालक फरार छन् ।

शनिबार बेलुका मोरङ ग्रामथान गाउँपालिका– २ बतराहीमा ट्याक्टर दुर्घटना हुँदा चालकको मृत्यु भएको छ । आरएमसी ईट्टा उद्योगबाट ईंटा लोड गरी निस्किएको को १ त ७४२५ नम्बरको ट्रयाक्टर खेतमा दुर्घटना हुँदा ट्याक्टर चालक कटहरी गाउँपालिका– ५ बस्ने २० वर्षीय राहुल सरदार मृत्यु भएको हो ।

प्रहरीका अनुसार खेतमा फसेको ट्याक्टरलाई ईटा भट्टाकै ३७०१ नम्बरको जेसीबीले पछाडीबाट धकेल्दा ट्याक्टरको इन्जिनको भाग उठेर ईटा लोड गरेको डालामा ठोक्किएको थियो । सो क्रममा चालक गम्भीर घाइते भएका थिए । उपचारका लागि कोशी अस्पताल ल्याए लगतै चिकित्सकले मृत घोषित गरेका थिए । दुवै सवारी चालकको लापरवाहीका कारण दुर्घटना भएको प्रहरीले बताएको छ । जेसीबी चालक फरार रहेको प्रहरीले बताएको छ ।

शनिबार दिउँसो सुनसरीको दुहबी नगरपालिका– ३ फुटानी चौकमा प्र २–०१–००१ च ०२५१ नम्बरको भ्यान अनियन्त्रित भइ दुर्घटना हुँदा त्रियुगा नगरपालिका– ८ राजाबासका ३० वर्षीय नेपाल प्रहरीका असई विरोध खतिवडाको मृत्यु भएको हो । खतिवडा जिल्ला प्रहरी कार्यालय उदयपुरमा कार्यरत थिए ।

प्रहरीका अनुसार कोशी राजमार्गको इटहरी – विराटनगर सडक खण्डमा इटहरीबाट विराटनगर तर्फ आउँदै गरेको भ्यान अनियन्त्रित भइ सडक बारमा ठोक्किएको थियो । दुर्घटनामा खतिवडासँगै तिन जना घाइते भएका थिए ।

प्रहरीका अनुसार खतिवडाको विराट शिक्षण अस्पतालमा उपचारका क्रममा उनको मृत्यु भएको हो । दुर्घटनामा चौदण्डीगढी नगरपालिका– ६ का ३८ वर्षीय सुरेश कार्की र १४ वर्षीय रोजिना कार्की घाइते भएका छन् । सुरेश चालक हुन् । रोजिना उनको छोरी हुन् । उनीहरुको अवस्था सामान्य छ ।