भारत र पाकिस्तानबीच युद्धविराम

विराटनगर । भारत र पाकिस्तानबीच युद्धविराम भएको छ । शनिबारबाट लागु हुनेगरि युद्धविराम भएको हो । दुई देशबीच युद्धविराम सहमति भएपछि पछिल्लो सातादेखिएको तनाव अन्त्य भएको हो ।

दुवै देशले युद्धविरामको सहमति भएको घोषणा गरेका छन् । भारत र पाकिस्तानले घोषणा गर्नुअघि अमेरिकी राष्ट्रपति डोनाल्ड ट्रम्पले युद्धविराम भएको घोषणा गरेका थिए ।

“संयुक्त राज्य अमेरिकाको मध्यस्थतामा रातभरको लामो वार्ता पछि, म यो घोषणा गर्न पाउँदा खुसी छु कि भारत र पाकिस्तान पूर्ण र तत्काल युद्धविराममा सहमत भएका छन्,’ ट्रम्पले भनेका छन् ,‘सामान्य ज्ञान र उत्कृष्ट बुद्धिमत्ता प्रयोग गरेकोमा दुवै देशलाई बधाई छ। यस विषयमा ध्यान दिनुभएकोमा धन्यवाद ।’

ट्रम्पको घोषणापछि भारत र पाकिस्तानले युद्धविराम सहमति भएको बताएका हुन् ।

भारतका विदेश सचिव विक्रम मिश्रीले युद्धविराम भएको बताए । ‘पाकिस्तानका सैन्य अपरेशनका महानिर्देशकले आज दिउँसो आफ्नो भारतीय समकक्षीलाई फोन गरे र एउटा सम्झौता भयो,’ उनले भनेका छन्,‘दुवै पक्षले आज भारतीय समय अनुसार १७ः ०० देखि जमिन, आकाश र समुद्रमा सबै लडाइँ र सैन्य कारबाही रोक्ने सहमति भएको छ ।’ समझदारीलाई प्रभावकारी बनाउन दुवै पक्षलाई निर्देशन दिइएको उनले बताए ।

पाकिस्तानका विदेशमन्त्रीले इशाक दारले भारतसँग युद्धविराम भएको बताएका छन् ।

‘पाकिस्तान र भारतले तत्काल लागू हुने गरी युद्धविराम गर्न सहमत भएका छन्,’ उनले भनेका छन्,‘पाकिस्तानले आफ्नो सार्वभौमसत्ता र क्षेत्रीय अखण्डतामा सम्झौता नगरी सधैं यस क्षेत्रमा शान्ति र सुरक्षाको लागि प्रयासरत रहेको छ ।’