एन्फा साधारणसभामा पूर्वअध्यक्ष गणेश थापालाई रोकेपछि विवाद

काठमाडौं । अखिल नेपाल फुटबल संघ (एन्फा)को साधारणसभामा तनाव भएको छ । पूर्वअध्यक्ष गणेश थापालाई प्रवेशमा रोक लगाएपछि विवाद भएको हो । बाहिर तनाव भएपनि हलभित्र साधारण सभा भने जारी छ । राखेप अध्यक्ष टंकलाल घिसिङले पानसमा बत्ती बालेर साधारण सभा उदघाटन गरेका थिए ।

साधारण सभामा प्रवेशका लागि पास नभएको भन्दै आयोजकले थापालाई गेटमै रोक्दा विवाद भएपछि उल्लेख्य संख्यामा सुरक्षाकर्मी परिचालन गरिएको छ ।

थापा र उनका समर्थकहरु भने भित्र प्रवेश गर्न पाउनुपर्ने माग राखेका छन् । एन्फाका प्रवक्ता सुरेश शाहले अदालतबाट आएको फैसलाबारे औपचारिक जानकारी नभएका कारण प्रवेश नगराइएको बताएका छन् ।

अन्तर्राष्ट्रिय फुटबल महासंघ (फिफा)ले थापालाई १६ अप्रिल २०१५ देखि प्रतिबन्ध लगाएपछि उनी निष्कृय थिए । १५ अप्रिल २०२५ मा प्रतिबन्ध फुकुवा भएपछि उनी फुटबलका गतिविधिहरुमा पुनः सक्रिय हुन थालेका छन् ।