भारत पाकिस्तानबीच मिसाइल हानाहान

काठमाडौं । पाकिस्तान र भारतले एक अर्कामाथि मिसाइल प्रहार गरेका छन् । बिहीबार राति दुई देशको सीमा क्षेत्रमा मिसाइल र ड्रोन हानाहान भएको हो ।

पाकिस्तानले लगातार दोस्रो दिन ड्रोन र मिसाइल हमला गरेको भारतीय सञ्चार माध्यमहरुले जनाएका छन् ।

ती आक्रमणलाई भारतले असफल बनाएको दाबी छ ।  पाकिस्तानले जम्मु, पठानकोट र उधमपुरका सैन्य ब्यारेकमा आक्रमण गरेको तर ती सबैलाई असफल पारेको भारतको रक्षा मन्त्रालयले जनाएको छ ।

भारतीय मिडियाहरुका अनुसार जम्मु कश्मिरको जम्मु, साम्बा, केरन, तंगधार, करनाह, अखनुर, आरएसपुरा सेक्टर, अरनिया लगायतका स्थानलाई लक्षित गरी आक्रमण भएको थियो ।

आक्रमणका विषयमा दुवै देशले सार्वजनिक रुपमा अभिव्यक्ति दिएका छैनन । क्षतिको विवरण पनि सार्वजनिक भएको छैन ।

२४ विमानस्थल बन्द

पाकिस्तानसँग अघोषित युद्ध सुरु भएपछि भारतले आफ्ना २४ विमानस्थल नागरिक सेवाका लागि बन्द गरेको छ । पञ्जाब, जम्मू कश्मीर, लद्दाख, गुजरात, राजस्थान र हिमाचल प्रदेशका २४ विमानस्थलहरू नागरिक सेवाका लागि बन्द गरेको बीबीसीले जनाएको छ ।

नागरिक उड्डयन सुरक्षा ब्यूरोले देशभरका सबै एयरलाइन्स र विमानस्थलहरूलाई सुरक्षा उपायहरू बढाउन निर्देशन दिएको छ । एयर मार्शलहरू पनि तैनाथ गरिएको छ ।