पाकिस्तानमाथिको आक्रमण पछि भारतमा हवाई उडान प्रभावित

काठमाडौं । भारतले पाकिस्तानमा ‘अप्रेसन सिंदूर’ नाम दिएर मिसाईल आक्रमण गरेपछि कश्मिर  क्षेत्र असान्त बनेको छ । जसका कारण भारतीय एयरलाइन्सहरूले ट्राभल एडभाइजरी जारी गरेका छन् ।

आक्रमणका कारण धेरै उडानहरू रद्द भएका छन् ।

एयर इन्डिया, स्पाइसजेट र इन्डिगोले यात्रुहरूलाई सतर्क रहन आग्रह गर्दै सूचित गरेका छन् । उनीहरूले उत्तर भारतका केही क्षेत्रमा हवाई यातायातमा अस्थायी अवरोध आएको जानकारी दिएका छन् ।

एयर इन्डियाले सामाजिक सञ्जाल एक्समा पोस्ट गर्दै लेखेको छ, ‘वर्तमान परिस्थितिलाई ध्यानमा राख्दै, एयर इन्डियाले ७ मे दिउँसो १२ बजेसम्म जम्मू, श्रीनगर, लेह, जोधपुर, अमृतसर, भुज, जामनगर, चण्डीगढ़ र राजकोट जाने–आउने सबै उडानहरू रद्द गरेको छ।’

अमृतसरका लागि तय दुई अन्तर्राष्ट्रिय उडानलाई दिल्लीतर्फ डाइभर्ट गरिएको जानकारी पनि दिइएको छ ।

स्पाइसजेटले धर्मशाला, लेह, जम्मू, श्रीनगर र अमृतसरलगायत उत्तर भारतका केही विमानस्थलहरू अर्को सूचनासम्म बन्द गरिएको जनाएको छ ।

इन्डिगोले पनि श्रीनगर, जम्मू, अमृतसर, लेह, चण्डीगढ़ र धर्मशालातर्फका उडानहरू प्रभावित भएको जानकारी दिएको छ । तीनवटै एयरलाइन्सले यात्रुहरूलाई फ्लाइटको अवस्थाबारे जानकारी लिएर मात्र विमानस्थल पुग्न अनुरोध गरेका छन् ।

कश्मिर क्षेत्रमा शैक्षिक संस्थाहरु पनि बन्द भएका छन् । शैक्षिक संस्था आजका लागि बन्द गरिएकाे हाे ।