काेशी प्रदेशले तीन दिन गणतन्त्र दिवस मनाउने

विराटनगर । कोशी प्रदेश सरकारले तीन दिन गणतन्त्र दिवस मनाउने भएको छ । जेठ १४,१५ र १६  गणतन्त्र दिवस  मनाउने भएको हो ।

मुख्यमन्त्री हिक्मतकुमार कार्कीले गणतन्त्र दिवस–२०८२ लाई भव्य रुपमा मनाउन निर्देशन दिएका छन् । मुख्यमन्त्री तथा मन्त्रिपरिषदको कार्यालय विराटनगरमा मंगलबार गणतन्त्र दिवस मनाउने तयारी बैठकलाई सम्बोधन गर्दै भव्य बनाउन निर्देशन दिएका हुन् ।

‘दिवसलाई दिवसका रुपमा मात्र होइन यसलाई सबैले अपनत्व गरी मनाउनुपर्छ र गणतन्त्रलाई बलियो र संस्थागत बनाउनका लागि यो दिवस भव्य रुपमा मनाउनुपर्छ,’ उनले भने ।

मुख्यमन्त्री कार्कीले गणतन्त्रपछि प्राप्त उपलब्धीलाई आम नागरिकमा जानकारी गराउने र व्यवस्थाप्रतिको भरोसा जगाउन दिवसलाई भव्य रुपमा मनाउन आग्रह गरे ।