ट्याक्टरकाे ठक्करबाट जन्तीकाे मृत्यु

उदयपुर । उदयपुरमा ट्याक्टरकाे ठक्करबाट बेहुली लिएर फर्कदै गरेका जन्ती गएका एक जना मृत्यु भएको छ । अर्का एक जना घाइते भएका छन् ।

चौदण्डीगढी नगरपालिका–४ स्थित मदन भण्डारी मार्गको बर्खेडाँडामा सोमबार साँझ हलेसी तुवाचुङबाट बेहुली लिएर सुनसरीतर्फ फर्कदै गरेको बसमा सवार एक जनाकाे मृत्यु भएकाे हाे । बर्खेडाँडा बस राेकी होटलमा खाजा खाएर फर्किने क्रममा पछाडिबाट आइरहेको ना ३ त ८१० नम्बरको ट्याक्टरले ठक्कर दिएको थियो ।

इलाका प्रहरी कार्यालय बेल्टारका अनुसार ठक्करबाट खोटाङको हलेसी तुवाचुङ नगरपालिका–४ बस्ने ४० वर्षीया गीता परियारको मृत्यु भएको हो । सुनसरीको इटहरी उपमहानगरपालिका–२० का २३ वर्षीय योजन राई घाइते छन् । उनको बिपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।

जन्तीलाई ठक्कर दिने ट्याक्टर चालक उदयपुरको चौदण्डीगढी नगरपालिका– ४ का ३० वर्षीया विजय विकलाई नियन्त्रणमा लिएर अनुसन्धान सुरु गरेको प्रहरीले बताएको छ ।