सरकार विचौलियाको नियन्त्रणमा चलेको प्रचण्डकाे आराेप

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सरकार जनताको सेवाभन्दा स्वार्थ समूहको नियन्त्रणमा चलेको आरोप लगाएका छन् ।

संघीय संसदमा प्रस्तुत सरकारको नीति तथा कार्यक्रममाथि बोल्ने क्रममा उनले सरकार स्वार्थ समूह र विचौलियाको नियन्त्रणमा चलेको आरोप लगाएका हुन् ।

‘सरकार जनताप्रति गैरजिम्मेवार देखिन्छ, तर स्वार्थ समूह र विचौलियाप्रति खुलेर समर्पित छ,’ उनले भने,‘ उद्योगीका अर्बौं बक्यौता उठाउन खोजिँदैन, तर गरीबको लाइन काटिन्छ, यस्तो विसंगति जनआक्रोशको कारण बनेको छ ।’ सत्तारुढ पक्षका मानिसले कानुन मिच्न पाएको बताउँदै उनले भुइँमान्छाको घरमा विजुली काट्ने अवस्था निन्दनीय रहेको बताए ।

ं‘सरकारको असंवेदनशीलता र स्वेच्छाचारिताले प्रतिगामी शक्तिहरूलाई पुनः शिर उठाउने मौका दिएको छ,’ उनले भने,‘ हिजो सामाजिक सञ्जालमा सीमित आक्रोश भोलि सडकमा पोखिन सक्छ ।’

नीति तथा कार्यक्रमलाई जनअपेक्षा अनुसार परिमार्जन गरी समावेशी, उत्पादनमुखी र जनमुखी कार्यक्रमसहित बजेटसँग सामञ्जस्य हुने गरी पुनः संरचना गर्नुपर्ने उनले बताए ।