झापामा स्कुटर दुर्घटना हुँदा एक जनाको मृत्यु

विराटनगर । झापामा स्कुटर दुर्घटना हुँदा १ जनाको मृत्यु भएको छ ।

आइतबार राति चन्द्रगढीबाट बनियानीतर्फ जाँदै गरेको प्रदेश १–०१–०१२ प ९९३७ नम्बरको स्कुटर आफैं अनियन्त्रित भएर भद्रपुर नगरपालिका–४ झापा चोकमा दुर्घटना भएको थियो । दुर्घटनामा परेर स्कुटरको पछाडि सवार भद्रपुर–२ का अन्दाजी ३५ वर्षीय अनिल लिम्बूको मृत्यु भएको हो ।

गम्भीर घाइते भएका लिम्बूको उपचारका क्रममा प्रादेशिक अस्पताल भद्रपुरमा राति ९ः३० बजेतिर मृत्यु भएको जानकारी प्रहरीले दिएको छ । स्कुटर र चालक दमक नगरपालिका–२ का २९ वर्षीय रविन फुयाँललाई नियन्त्रणमा लिएर प्रहरीले घटनाको अनुसन्धान सुरु गरेको छ ।

प्रारम्भिक अनुसन्धानबाट मोटरसाइकल चालक फुयाँल र पछाडि सवार लिम्बू दुवै जनाले मापसे गरेको देखिएको प्रहरीले बताएको छ ।