मोरङ कारागारमा दुई जना कैदीबन्दीको मृत्यु

विराटनगर । जिल्ला कारागार मोरङमा एक सातामै दुई जनाको मृत्यु भएको छ । एक जना थुनुवा र एक जना कैदीको मृत्यु भएको हो ।

आइतबार ठगी मुद्दाका थुनुवा रामेछापको दोरम्बा–सैलुङ गाउँपालिका–२ घर भएका ५४ वर्षीय प्रवीण तामाङको मृत्यु भएको कारागारका जेलर गौरव ढुंगेलले जानकारी दिए । उनका अनुसार श्वासप्रश्वासमा समस्या भएपछि तामाङलाई उपचारका लागि शनिबार साँझ विराटनगरको कोशी अस्पतालमा भर्ना गरिएको थियो । उपचारको क्रममा आइतबार बिहान मृत्यु भएको हो । उनी २०८१ पुस १६ गते पुर्पक्षका लागि मोरङ कारागार चलान भएका थिए ।

बैशाख १५ गते मोरङको उर्लाबारी नगरपालिका–१ घर भएका कैदी ४३ वर्षीय मित्रकुमार दनुवारको मृत्यु भएको हो । दनुवारलाई जबरजस्ती करणी मुद्दामा अदालतले २५ वर्ष कैद सजाय सुनाएको थियो । उनलाई चैत १३ गते कोशी अस्पताल भर्ना गरिएको थियो । उपचारकै क्रममा चैत १५ गते मृत्यु भएको हो । दनुवार २०७८ साल असार ७ गते कारागारमा थिए ।

महिला र पुरुष गरेर ३ सय जना क्षमताको कारागारमा १ हजार ३८ जना कैदीबन्दी छन् । कारागारमा ३ नाबालकसहित १ सय ७ महिला र ९ सय २८ पुरुष छन् ।