कोशी लगानी सम्मेलन :४६ परियोजनामा डेढ खर्बको लगानी सम्झौता 

विराटनगर । कोशी प्रदेश सरकारले पहिलो पटक आयोजना गरेको  प्रदेश लगानी सम्मेलनमा ४६ वटा परियाेजनामा १  खर्ब ५२ अर्ब १६ करोड बराबरको लगानी सम्झौता भएको छ । शुक्रबार  १  खर्ब ५२ अर्ब १६ करोड लागत अनुमान भएका ४६ वटा परियाेजना सञ्चालनका लागि सम्झौता भएको हो । सम्मेलनमा ७१ वटा परियोजना राखिएको थियाे ।

प्रदेश लगानी प्राधिकरणका अनुसार कृषि तर्फ आठ परियोजनामा ३  अर्ब, ऊर्जा तर्फ तीन परियोजनामा आठ अर्ब, ६२ करोड, उद्योग तर्फ १२ परियोजनाका लागि ६६ अर्ब  ८७ करोड, पूर्वाधारका नौ परियोजना तर्फ ३८  अर्ब ४१ करोड, पर्यटनका १० परियोजनाका ३४  अर्ब १९ करोड,  सूचना प्रविधिका दुई परियोजनामा ४७ करोड, फोहोर मैला व्यवस्थापनको ६० करोडको परियोजना सम्झौता भएको हो ।

निजी क्षेत्रका १९ वटा र सार्वजनिक निजी साझेदारीका २७ वटा परियोजना सम्झौता भएको हो । सम्मेलनमा ७१ वटा परियोजना सोकेसिङ गरिएको थियो ।  ति परियोजनाको अनुमानित लागत एक  खर्ब ७३ अर्ब ४९ करोडको थियो ।

समापन समारोहलाई सम्बोधन गर्दै कोशी प्रदेशका मुख्यमन्त्री हिक्मतकुमार कार्कीले लगानी सम्मेलन सफल भएको बताए ।