सुनसरी र धनकुटामा ११ सय ४५ किलाे गाँजा बरामद

विराटनगर । प्रहरीले धनकुटा र सुनसरीबाट एक हजार १ सय ४५ किलो गाँजासहित तीन जनालाई पक्राउ गरेको छ । साेमबार राति २  वटा सवारी साधन र गाँजासहित ३ जनालाई पक्राउ गरेकाे हाे ।

साेमबार राती धनकुटाको चौबिसे गाउँपालिका– ५ मा ना ५ ख ६१५७ नम्बरको ट्रकमा लोड गरेर राखेको अवस्थामा ९ सय ४६ किलो गाँजा बरामद गरेको हाे ।

गाँजा बरामद भएपछि ट्रकसहित ओसारपसारमा संलग्न भएकाे आराेपमा प्रहरीले चौविसे गाउँपालिका– ५ का मनोज लिम्बुलाई पक्राउ गरेको छ ।

सुनसरीको बर्जु गाँउपालिका– ३ बाट १९९ किलो गाँजासहित दुई जना पक्राउ परेका छन् । प्र १–०२– ००२ च ५१२६ नम्बरको पिकअप लोड गरिएको अवस्थामा १ सय ९९ किलो गाँजा बरामद गरेको हो ।

गाँजा र पिकअपसँगै प्रहरीले ओसार पसारमा संलग्न भएको आरोपमा चालक धनकुटा नगरपालिका– ९ उद्धव भण्डारी र सहचालक सोही स्थानका कबिराज राईलाई नियन्त्रणमा लिएको छ । पक्राउ परेकाहरुमाथि थप अनुसन्धान भइरहेको प्रहरीले बताएको छ ।