धरानकाे ग्यारेजबाट चोरी भएको बस विराटनगरमा भेटियो

विराटनगर । धरानकाे ग्यारेजबाट चाेरी भएकाे यात्रुबहाक बस विराटनगरमा फेला परेको छ । शुक्रबार बिहान धरान उपमहानगरपालिका –८ दुर्गापथस्थित ग्यारेजबाट चोरी भएको प्रदेश १ को ९७४९ नम्बरको बस मंगलबार दिउँसो विराटनगर महानगरपालिका – १२ मंगलबारेमा भेटिएको हो ।

बनाउनका लागि ग्यारेजमा राखिएकाे अवस्थामा चाेरी भएकाे बस  खोजी गर्ने क्रममा पाटपूर्जा निकालिएकाे अवस्थामा विराटनगरमा भेटिएकाे हाे । विराटनगर १२ मा भेटिएकाे बसको पाटपूर्जा भने विराटनगर–६ स्थित गीतादेवी साहले सञ्चालन गरेको कवाडी गोदाममा फेला परेको छ ।

चाेरी भएकाे बसको अगाडिको सिसाको माथिल्लो भागमा सिद्धदेवी यातायात र तल्लो भागमा याक्थुङ यातायात लेखिएको छ ।

धरानबाट चोरी भएको बस पूर्वपश्चिम हाइवेमा पर्ने खोर्सानेसम्म पुगेको सीसीक्यामेरामा देखिएको थियो । त्यहाँबाट विराटनगर तर्फ आएकाे देखिएपनि बस फेला परेकाे थिएन् । मंगलबार दिउँसाे मंगलबारेमा वेवारिसे अवस्थामा बस देखिएपछि स्थानीयले प्रहरीलाई खबर गरेका थिए । बस चोरी गर्ने गिरोहको खोजी भइरहेको प्रहरीले बताएको छ ।