सात कठ्ठाकाे लौका खेतीले एक सिजनमा चार लाख आम्दानी

सुनसरी । सात कठ्ठा जग्गामा लौका खेती गर्दा सुनसरीको गढी गाउँपालिका–५ का अनुरुप उराँवले एक याममा चार लाखसम्म आम्दानी गरेका छन् ।

वार्षिक २० हजारमा सात कठ्ठा जग्गा भाडामा लिएर लौकाखेती गरेका उनले चार लाखसम्म आम्दानी गरेका हुन् ।

उनले सात कठ्ठाका जग्गामा पाँच सय लहरा लौका रोपेको जानकारी दिए । ती बिरुवा रोप्दा ५० हजार लगानी भएको उनको भनाइ छ । बीउ, खाद्यमल, पानी, खेती तयारीलगायत खेती र बारी व्यवस्थापनमा ५० हजार खर्च भएको भन्दै उनले एक याममा चार लाखसम्म आम्दनी हुने बताए ।

युवा विदेश पलायन भइरहेको, केही ठगीमा परेको समाचार बाहिर आइरहेका बेला कम लगानीमा चार लाखसम्म आम्दानी हुने भन्दै उनले युवालाई स्वदेशमै स्वरोजगार बन्न आग्रह गरे ।

उराँवले भिरालो जग्गामा तीन महिनादेखि वर्षभरि फल्ने कदुखेतीबाट थोरै लगानीमा धेरै आम्दानी गर्न सफल भएको बताए ।

लौका सुरुमा प्रतिगोटा ८० मा बिक्री गरेकामा अहिले २० देखि २५ रुपैयाँमा बारीबाटै बिक्री भइरहेको बताए ।