गाईघाटबाट काँकडभिट्टा जाँदै गरेको बस दुर्घटना हुँदा तीन जनाको मृत्यु

विराटनगर । पूर्व–पश्चिम राजमार्गअन्तर्गत सप्तरीको कन्चनरुप नगरपालिका–१० बदगामा बस दुर्घटना हुँदा तीन जनाको मृत्यु भएको छ । उदयपुरको गाईघाटबाट झापाको काँकडभिट्टातर्फ जाँदै गरेको यात्रुवाहक बस आइतबार मध्यान्ह दुर्घटना हुँदा ३ जनाको मृत्यु भएको हो । दुर्घटनामा २३ जना घाइते भएका छन् ।

प्रहरीका अनुसार आइतबार दिउँसो प्रदेश १–०१–००१ ख ३४२० नम्बरको बस दुर्घटनामा परेको थियो । इलाका प्रहरी कार्यालय कन्चनपुरका डीएसपी माधवप्रसाद काफ्लेका अनुसार बस आफैं अनियन्त्रित भएर दुर्घटना भएको थियो ।

दुर्घटनामा परेर सप्तरीको सप्तकोशी नगरपालिका–१ का ७५ वर्षीय रत्नबहादुर मगराती र पहिचान नखुलेका १ पुरुष र १ जना महिलाको मृत्यु भएको प्रहरीले बताएको छ ।

बसमा ३५ जना सवार थिए । तीमध्ये कम्तीमा २३ जना घाइते भएका छन् । घाइतेमध्ये केहीको अवस्था गम्भीर र केहीको मध्यम एवं सामान्य छ ।