सभामुखलाई सांसद राई पक्राउको सूचना

काठमाडौं । नेपाली कांग्रेसकी सांसद माया राई पक्राउ परेको जानकारी प्रहरीले सभामुखलाई दिएको छ ।

जिल्ला प्रहरी परिसर काठमाडौंले शनिबार बेलुका सांसद राईलाई पक्राउ गरेको थियो । शनिबार नै नै संघीय संसद सचिवालयलाई पत्र पठाएर राईलाई हिरासतमा राखेको जानकारी दिएको हो ।

राईमाथि कालिमाटीस्थित स्वर्णलक्ष्मी बचत तथा ऋण सहकारी संस्थाको रकम अपचलनमा मुद्दा चलाउन सिफारिस गरिएको थियो ।

सहकारी ठगी र संगठित अपराधको कसुरमा काठमाडौं जिल्ला अदालतबाट पक्राउ पुर्जी जारी भएको थियो ।

राई समेतका व्यक्तिले ६९० बचतकर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप छ । राई जनजाति कोटाबाट कांग्रेस समानुपातिक सांसद बनेकी हुन् ।

सभामुख देवराज घिमिरेले आज बस्ने संसद बैठकमा सांसद पक्राउकाे जानकारी गराउनेछन् ।