दुर्गा प्रसाईंलाई ल्याइयो काठमाडौं

काठमाडौं । झापाको भद्रपुर विमानस्थलबाट दुर्गा प्रसाईंलाई काठमाडौं ल्याइएको छ । बिहीबार भारतीय प्रहरीले भारतको आसामबाट नियन्त्रणमा लिएर आज नेपाल प्रहरीलाई जिम्मा लगाएको थियो । शुक्रबार दिउँसो बुद्ध एयरको जहाजमार्फत काठमाडौं ल्याइएको हो ।

चैत १५ गते काठमाडौंको तीनकुनेमा हिंसात्मक प्रदर्शनपछि राजावादी आन्दोलनका कमाण्डर प्रसाईं भारततिर भागेका थिए । उनलाई काँकडभिट्टा नाका हुँदै शुक्रबार बिहान झापा ल्याइएको हाे । केहीबेर जिल्ला प्रहरी कार्यालयको हिरासतमा राखियो । त्यसपछि भद्रपुर विमानस्थलबाट काठमाडौं पठाइएको प्रहरीले जनाएको छ ।

राजसंस्था पुनर्स्थापनाका लागि भन्दै संयुक्त जनआन्दोलन परिचालन समितिले तीनकुनेमा चैत १५ गते गरेको प्रदर्शन हिंसात्मक बन्दा १ जना पत्रकारसहित २ जनाको मृत्यु भएको थियो ।