धरानकाे जंगलमा महिलाको शव : अनुसन्धानका लागि चार जना प्रहरी नियन्त्रणमा

विराटनगर । सुनसरीको धरान उपमहानगरपालिका–६ स्थित पाँचकन्या सामुदायिक वनमा गत सोमबार अर्धनग्न अवस्थामा मृत फेला परेको ३४ वर्षीया चुनकुमारी दाहाल बुढाथोकीकाे हत्यामा परिवार सदस्य संलग्न रहेको निष्कर्षमा प्रहरी पुगेको छ ।

सोमबार दिउँसो मृत भेटिएकी महिलाकाे पहिचान बिहीबार खुलेकाे थियाे । मृतक महिला धनकुटाको महालक्ष्मी नगरपालिका–२ स्थायी ठेगाना भएकी ३४ वर्षीया चुनकुमारी दाहाल बुढाथोकी हुन् । प्रारम्भिक अनुसन्धानका क्रममा प्रहरी परिवारकै संलग्नता रहेको निष्कर्षमा पुगेको हो ।

घटना अनुसन्धानका लागि प्रहरीले देवर देउरानीसहित चार जना आफन्तलाई नियन्त्रणमा लिएको छ । थप व्यक्तीलाई पनि नियन्त्रणमा लिएर अनुसन्धान गरिरहेको प्रहरीले बताएको छ ।

धनुकटाको महालक्ष्मी–१ माइती भएकी चुनकुमारी विगत २ वर्षदेखि सुनसरी इटहरीको हलगडामा १३ वर्षीय छोरासँग डेरामा बस्दै आएकी थिइन् । उनका श्रीमान प्रेमबहादुर बैदेशिक रोजगारीका लागि कोरियामा छन् ।

प्रहरीका अनुसार श्रीमान प्रेमसँग चुनकुमारीको सम्बन्ध राम्रो थिएन् । चुनकुमारीको हत्यामा श्रीमानसँगको खटपट पनि कारण देखिएको प्रहरीले बताएको छ । इलाका प्रहरी कार्यालय धरानका डिएसपी प्रकाश जबेगुले घटनाकाे अनुसन्धान भइरहेकाे बताए । घटनाकाे विषयमा साेधपुछका लागि केहीलाई ल्याइएकाे उनले बताए ।