कुवेतमाथि नेपालको कीर्तिमानी जित

काठमाडौं । नेपालले हङकङमा जारी टी– २० आई शृखलामा कुवेतमाथि ६ विकेटको कीर्तिमानी जित हात पारेको छ । कुशल भुर्तेल र दीपेन्द्र सिंह ऐरीको आक्रामक ब्याटिङमा नेपालले कीर्तिमानी जित हात पारेको हो ।

हङकङको मोङ कोकस्थित मिसन रोड ग्राउण्डमा कुवेतले दिएको १८६ रनको लक्ष्य पछ्याएको नेपालले नेपालले ७ बल बाँकी छँदा ४ विकेटको क्षतिमा पूरा गरेको थियो । यो नेपालले टी– २०आईमा लक्ष्य पूरा गर्दा बनाएको उच्च योगफल हो ।

नेपालका लागि ओपनर कुशल भुर्तेलले सर्वाधिक ८१ तथा आसिफ शेखले ५३ रन बनाए । पहिलो विकेटका लागि ओपनरले १२७ रनको साझेदारी गरेका थिए ।

यो साझेदारी पनि नेपालको टी– २०आईमा सर्वाधिक रनको ओपनिङ साझेदारी हो । यसअघि सन् २०२१ मा नेदरल्याण्ड्ससँग नेपालले ११६ रनको ओपनिङ साझेदारी गरेको थियो । भुर्तेलले ५० बल खेल्दै ८१ रन बनाए । आसिफले ५३ रन बनाए ।

दिपेन्द्रसिंह ऐरीले १२ बलमा ३१ रन बनाएका थिए । कुवेतका यासिन पटेलले ४ ओभरमा १७ रन दिएर २ विकेट लिए । मोहम्मद सफीक र मोहम्मद असलमले १–१ विकेट लिए ।

टस हारेर पहिले ब्याटिङको निम्तो पाएको कुवेतले २० ओभरमा ७ विकेट गुमाएर १८५ रन बनाएको थियो ।

कुवेतका लागि क्लिन्टो एन्टोले सर्वाधिक ४१ रन बनाए । मिट भावसरले ३५ तथा बिलाल ताहिरले ३२ रन बनाए । रविजा सन्दरुवानले २६ रन बनाए । नेपालका लागि सोमपाल कामीले ४ ओभरमा ३६ रन खर्चेर ३ विकेट लिँदा नन्दन यादवले ४ ओभरमा ३४ रन खर्चेर २ विकेट लिए । ललित राजवंशी र कुशल भुर्तेलले १–१ विकेट हात पारे ।

लगातार दोस्रो जित निकालेको नेपालले फाइनल खेल्ने सम्भावना बलियो बनाएको छ । नेपालले पहिलो खेलमा कतारलाई पराजित गरेको थियो । अब नेपालले लिग चरणको अन्तिम खेलमा घरेलु टोली हङकङसँग शनिबार खेल्नेछ ।