सुनको मूल्यमा फेरि बन्याे नयाँ रेकर्ड

काठमाडौं । नेपाली बजारमा सुनको मूल्यले फेरी नयाँ रेकर्ड बनाएको छ । बिहीबार ५ हजार ७ सय रुपैयाँ बढेर नयाँ रेकर्ड बनाएको हो ।

बुधबार प्रतितोला १ लाख ७५ हजार ४ सय रुपैयाँमा सुनको कारोबार भएको थियो । आज १ लाख ८१ हजार १ सय रुपैयाँ पुगेको छ । बुधबार पनि तोलामा २ हजार बढेको थियो ।

यसअघि गत शुक्रबार १ लाख ८० हजार ३ सय रुपैयाँको उच्चतम रेकर्ड बनेको थियो । आज नयाँ रेकर्ड बनेको हो । आज चाँदीको मूल्य ६५ रुपैयाँ बढेको छ । अघिल्लो दिन १८३५ रुपैयाँ रहेकोमा आज १९०० रुपैयाँ पुगेको हो ।

अमेरिकी राष्ट्रपति डोनाल्ड ट्रम्पले बुधबार ७५ भन्दा बढी देशहरूमाथि लगाइएको पारस्परिक भन्सार शुल्क ९० दिनका लागि रोकेसँगै सुनको मूल्य अन्तर्राष्ट्रिय बजारमा बढेको छ । अन्तर्राष्ट्रिय बजारमा एकैदिन सुनको भाउ ४ प्रतिशतभन्दा धेरै बढेर प्रतिऔंस ३१०० डलर नाघेको छ ।