काेशी पर्यटन वर्षकाे उद्घाटन सिंहले गर्ने, प्रधानमन्त्री ओली आएनन्

विराटनगर । कोशी प्रदेशले मनाउन लागेकाे पर्यटन वर्ष २०८२ को उद्घाटन उपप्रधानमन्त्री प्रकाशमान सिंहले गर्ने भएका छन् ।

पर्यटकीय क्षेत्र तीनजुरे मिल्के क्षेत्रबाट पर्यटन वर्षको शुभारम्भ प्रधानमन्त्री केपी शर्मा ओलीले गर्ने तयारी थियो । कोशी प्रदेश सरकारले पनि ओलीले नै उद्घाटन गर्ने भन्दै प्रचारप्रसार गरेको थियो । तर ओली नआउने भएका छन् । उनले उपप्रधानमन्त्री प्रकाशमान सिंहलाई पठाएका हुन् ।

तेह्रथुमका प्रमुख जिल्ला अधिकारी प्रकाशचन्द्र अधिकारीका अनुसार उपप्रधानमन्त्री सिंहले आजको कार्यक्रम उद्घाटन गर्ने तयारी छ ।

मुख्यमन्त्री हिक्मतकुमार कार्की निकट स्रोतका अनुसार प्रधानमन्त्री ओलीले आउने बचन दिएपछि उनकै नाम राखेर निमन्त्रण पत्र छापिएको थियो । प्रचारप्रसार पनि प्रधानमन्त्री कै नाम जोडेर गरिएको थियो । तर अन्तिम समयमा ओली आएनन् । याे वर्ष तीनजुरे मिल्के जलजले क्षेत्रमा गुराँस फुलेकाे छैन । ओली आउने भएपछि गुराँस फुलाउने भन्दै स्थानीय सरकारले दमकल प्रयाेग गरेर गुराँसकाे बाटेमा पानी समेत हालेकाे थियाे ।

आउँछु भन्दै कोशी प्रदेशमा तय भएको कार्यक्रममा नआएको ओली पहिलो पटक भने होइन् । यसअघि नेकपा एमाले मोरङको १० औं जिल्ला अधिवेशन र प्रेस चौतारी नेपालको महाधिवेशनमा ओली आउने भन्दै प्रचारप्रसार भएको थियो । तर ती कार्यक्रममा पनि ओली आएनन् ।

फागुन १६ गतेको एमालेकाे जिल्ला अधिवेशनकाे उद्घाटनमा ओलीले रामबहादुर थापा बादललाई पठाएका थिए । चैत १० गते प्रेस चौतारी महाधिवेशनको उद्घाटनमा महासचिव शंकर पोखरेललाई पठाएका थिए ।