ग्रामथान अध्यक्षलाई उपाध्यक्षले सुभ यात्रा भनिनन्, कार्यवहाककाे जिम्मेवारी वडाध्यक्षलाई

विराटनगर । मोरङको ग्रामथान गाउँपालिकाका अध्यक्ष नमोनारायण माझीले आफ्नो अनुपस्थितिमा कामकाज गर्नेगरी वडाध्यक्षलाई कार्यवहाक अध्यक्षकाे जिम्मेवारी दिएका छन् ।

मंगलबारबाट ९ दिनका लागि चीन भ्रमणमा जाने भएपछि सोमबार माझीले वडा नम्बर ३ का वडाध्यक्ष रमेशकुमार भगतलाई कार्यवहाक जिम्मेवारी दिएका हुन् ।

चीन जाने भएपछि आफूलाई सुभ यात्रा पनि नभनेको भन्दै उनले उपाध्यक्षलाई छाडेर वडाध्यक्षलाई जिम्मेवारी दिएका हुन् । यसअघि धरान उपमहानगरपालिकाका प्रमुख हर्क साम्पाङले आफूलाई शुभ यात्रा पनि नभनेकाे भन्दै उपमेयरलाई छाडेर वडाध्यक्षलाई कार्यवहाक जिम्मेवारी दिएका थिए ।

गत मंसिरमा भएकाे उपनिर्वाचनमा माझी माओवादी केन्द्रबाट वडाध्यक्ष निर्वाचित भएका थिए । माझीले कार्यवहाक दिएका भगत पनि माओवादी केन्द्रबाट निर्वाचित वडाध्यक्ष हुन् ।

चीन जानका लागि सोमबार कार्यालयबाट विदा भएका पालिका अध्यक्षलाई उपाध्यक्ष गुणवतीदेवी थारुले सुभ यात्रा पनि नभएको भगतले बताए । ‘उहाँले बधाई पनि दिनुभएन, शुभकामना पनि दिनुभएन,’ उनले भने,‘आज बैठक (विदाइ) थियो आउनुभएन ।’

पालिका उपाध्यक्ष गुणवतीदेवी थारुले अध्यक्षको विदाइका बारेमा आफूलाई खबर नआएको बताइन् । कार्यालयबाट दिउँसाे काम विशेषले विराटनगर आएको बताउँदै उनले भनिन् ,‘उहाँ जाँदै हुनुहुन्छ भन्ने मलाई के थाहा ? मलाई खबर नै थिएन ।’

पालिका अध्यक्ष माझी नेकपा माओवादी केन्द्रका नेता दिनानाथ शर्माको नेतृत्वमा मंगलबारदेखि ९ दिने चीन भ्रमणमा जाँदैछन् ।

कानुनत अध्यक्षले आफ्नाे अनुपस्थितिमा उपाध्यक्षलाई कार्यवहाक जिम्मेवारी दिनुपर्छ तर वडाध्यक्षलाई जिम्मेवारी दिएपछि उपाध्यक्ष थारुले अदालत जाने बताइन् ।