केराबारीबाट तीन वटा बन्दुकसहित दुई जना पक्राउ

विराटनगर । मोरङको केराबारीबाट प्रहरीले ३ नाल भरुवा बन्दुकसहित २ जनालाई पक्राउ गरेको छ । आइतबार साँझ वन्यजन्तुको चोरीसिकारीमा संलग्न समूहका २ जनालाई पक्राउ गरेको हो ।

केराबारी गाउँपालिका–८ स्थित आमजुंगी सामुदायिक वनमा वन्यजन्तुको सिकार गर्न गएको अवस्थामा पक्राउ गरेको प्रहरीले बताएको छ ।

मोरङ प्रहरीका प्रवक्ता डीएसपी वेदप्रकाश जोशीका अनुसार पक्राउ पर्नेमा केराबारी–८ का ४४ वर्षीय मणिराज याक्खा र ३४ वर्षीय डिल्लीकुमार कार्की छन् ।
केराबारी–८ का ३५ वर्षीय धनबहादुर लिम्बू फरार छन् । पक्राउ परेकाको साथबाट ३ नाल भरुवा बन्दुक बरामद भएको जानकारी डीएसपी जोशीले दिए ।

पक्राउ परेकाहरुलाई हातहतियार खरखजना मुद्दा चलाउने प्रहरीको तयारी छ ।