उच्च अदालतको आदेश लगतै रवि लामिछाने पक्राउ

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई प्रहरीले पक्राउ गरेको छ । शुक्रबार उच्च अदालतको बुटवल इजलासले पुर्पक्षका लागि थुनामा पठाउने आदेश दिएलगतै प्रहरीले लामिछानेलाई पक्राउ गरेको हो ।

बुटवलको सुप्रिम सहकारीको बचत अपचलन मुद्दामा जिल्ला अदालत रुपन्देहीले उनलाई १ करोड धरौटीमा छाडेको थियो ।

शुक्रबार न्यायाधीश रमेश ढकाल र स्वीकृति पराजुलीको संयुक्त इजलासले बुटवलस्थित सुप्रिम सहकारी ठगी सम्बन्धी कसूर र संगठित अपराध सम्बन्धी मुद्दामा जिल्लाको आदेश उल्टाउँदै थुनामा पठाउने आदेश दिएको थियो ।

कास्की, काठमाडौं, रुपन्देही र चितवन जिल्ला अदालतबाट सहकारीको बचत अपचलन मुद्दामा धरौटीमा छुटेका लामिछाने गत चैत १७ गते मात्रै पार्टीको जिम्मेवारीमा फर्किएका थिए । भोलि शनिबार चितवनमा सभा गर्ने उनको तयारी थियो । तर आज उनी घरबाटै पक्राउ परेका हुन् ।

पक्राउ पर्नुअघि लामिछानेले चितवनको सभा नरोक्न आग्रह गरेका छन् । ‘सम्मानित अदालतको आदेशको सम्मान गर्दै म आफै आजै अहिले नै गिरफ्तारी दिदैछु । साथै न्यायलयका अन्य ढोकाहरु मेरा लागि खुल्ला होलान् नै,’ उनले सामाजिक सञ्जालमा लेखेका छन्,‘ न्यायका लागि दुनियाँका सबै ढोका ढकढ्काउछु । म माथि ठुलो अन्याय भएको छ । चितवनको सभा नरोक्नुस् ।’