जहदाका उमेश कामतको घरमा १ हजार ८८ किलो गाँजा

विराटनगर । मोरङको जहदा गाउँपालिका ७ का उमेश कामतको घरमा १ हजार ८८ किलो गाँजा बरामद भएको छ । २७ वर्षीय कामतको घरबाट बिहीबार १ हजार ८८ किलो गाँजा बरामद भएको हो ।

तस्करको समूहले पूर्वी पहाडी जिल्लाबाट ल्याएको गाँजा भारत निकासीका लागि कामतको घरमा भण्डारण गरी राखको अवस्थामा बरामद भएको प्रहरीले बताएको छ । मोरङ प्रहरी प्रवक्ता डीएसपी वेदप्रकाश जोशीका अनुसार कामतको घरमा भेटिएको ३४ पोका गाँजा तौल गर्दा १ हजार ८८ किलो भएको थियो ।

बिहीबार नै जहदा –५ का ३३ वर्षीय अरविन साहको घरबाट १४ किलो गाँजा बरामद गरेको छ । गाँजासहित दुवैजना पक्राउ परेका छन् । ‘गाँजा बरामद भएको स्थान नेपाल–भारत सीमानजिक पर्छ,’ जोशीले भने,‘घरमा भण्डारण गरेर राखिएको गाँजा भारततिर कटाउन लागिएको आशंका छ । थप अनुसन्धान भइरहेको छ ।’