पाँचथरको डढेलोमा परी एक जनाको मृत्यु, तीन जना घाइते

विराटनगर । पाँचथरको निजी वनमा लागेको डढेलोमा परी एक जनाको मृत्यु भएको छ । तीन जना घाइते भएका छन् ।

पाँचथरको कुम्मायक गाउँपालिका– ३ मा रहेको निजी वनमा लागेको डढेलोमा परी घाँस दाउरा गर्न गएकी कुम्याक–३ हात्तीपोखरीकी २२ वर्षीया प्रतिमा सम्वाहाम्फेको मृत्यु भएको हो ।

आगोमा जलेर ६० वर्षीया निरमाया सम्वाहाम्फे, उनकी छोरी २८ वर्षीया सपना सम्वाहाम्फे, सपनाकी छोरी ११ वर्षीया शिवाना सम्वाहाम्फे गम्भीर घाइते भएका हुन् । मृतक युवती निरमायाको नातिनी हुन् ।

पाँचथर प्रहरी प्रमुख डीएसपी कौशलकुमार बुढाथोकीका अनुसार पहाडमा माथि घाँस दाउरा गरिरहेका बेला मुनीबाट आगलागी सुरु भएको थियो । भाग्ने ठाउँ नभेटेपछि आगोमा चार जना परेको उनले बताए ।

आगलागीमा परि चार जना गम्भीर घाइते भएका थिए । बिहीबार दिउँसो प्रहरीले उद्दार गरी उनीहरुलाई विपी कोइराला स्वास्थ्य विज्ञान प्रतिष्ठान धरान पठाएको उनले बताए । धरानमा उपचारका क्रममा बिहीबार राति प्रतिमाको मृत्यु भएको हो । अन्य तीन जनाको गम्भीर अवस्थामा उपचार भइरहेको छ ।

आगलागी भएको निजी वन सोही स्थानका अमर थापा र पदम खड्कालगायतको हो ।