सुनसरीबाट अपहरणमा परेकी बालिकाकाे उद्दार, एक जना पक्राउ

विराटनगर । सुनसरीको कोशी गाउँपालिका– ७ मुसहरी टोलबाट अपहरणमा परेकी ७ वर्षीय बालिकाको प्रहरीले सकुशल उद्दार गरेको छ । बुधबार दिउँसो करिब साढे १ बजे घर अगाडि खेलीरहेकी कुशेश्वर सदाकी ७ वर्षीया छोरी ईशु सदा अपहरणमा परेकी थिइन् ।

बिहीबार दिउँसाे प्रहरीले सप्तकाेशी नदीकाे सप्तरी खण्डबाट उद्दार गरेकाे हाे । अपहरणमा संलग्न भएकाे आराेपमा प्रहरीले सप्तरी कन्चनरुप नगरपालिका– १२ धरमपुरका ३१ वषीय जितुवा भन्ने जितेन्द्र साह (हलुवाई)लाई पक्राउ गरेकाे छ । उनले बालिकालाई लिएर जानुकाे कारण खुलेकाे छैन ।

बालिकाको खोजी गर्ने क्रममा बिहीबार दिउँसो सप्तकोशी नदीको पुलको ५६ नम्बर ढोकामा फेला पारेको जिल्ला प्रहरी कार्यालय सुनसरीका डिएसपी योगराज खतिवडाले बताए ।

बालिकालाई भारत तर्फ लगेको आशंकामा प्रहरीले भारतीय प्रहरीसँग पनि समन्वय गरेको थियो । खोजी गर्ने क्रममा बिहीबार दिउँसो सप्तकोशी पुलेको सप्तरी खण्डमा भेटिएपछि साहलाई पक्राउ गरी बालिकाको उद्दार गरेको डिएसपी खतिवडाले जानकारी दिए । उनका अनुसार साहले बालिकालाई किन लिएर गए भन्ने खुलेकाे छैन ।

कोशी गाउँपालिका– ७ का वडा अध्यक्ष लालदेव सदाका अनुसार बालिकालाई सिटी सफारीमा लिएर जाने व्यक्ती बेला बेला गाउँमा आँउथे । बुधबार घरमा कोही नभएको मौकामा बालिकालाई लिएर गएका थिए । उनका अनुसार साहले बालिकालाई बुधबार राजविराजमा राखेको देखिएकाे छ ।