रवीन्द्र मिश्रसहित ४२ जनालाई पाँच दिन हिरासतमा राख्ने अनुमति

काठमाडौं । राजावादी समूहले शुक्रबार तीनकुनेमा गरेको हिंसात्मक प्रदर्शनमा संलग्न भएको आरोपमा पक्राउ परेका ४२ जनालाई जिल्ला अदालत काठमाडौंले पाँच दिन हिरासतमा राख्ने अनुमति दिएको छ ।

न्यायाधीश तारादेवी महर्जनको इजलासले तीनकुने घटनामा संलग्न भएको आरोपमा पक्राउ रवीन्द्र मिश्र र सांसद धवलशमशेर जबरासहित परेका ४२ जनालाई पाँच दिन हिरासतमा राख्ने अनुमति दिएको हो । उनीहरु मंगलबारसम्म थुनामा रहनेछन् ।

जिल्ला सरकारी वकिलको कार्यालयले १० दिन थुनमा राख्न अनुमति मागेकोमा धवलशमशेर जबरा क्यान्सरको बिरामी भनी कागजात पेस भएको थियो भने रवीन्द्र मिश्रको हकमा प्रेसरको बिरामी भई इजलासमा फाइल पेस भएकाले अदालतले ५ दिनको अनुमति मात्रै भएको हो । जिल्ला प्रहरी परिसर, काठमाडौंले तीनकुने घटनामा संलग्न भएको आरोप लागेकाहरूलाई बेलुकी ५ बजेतिर जिल्ला अदालतमा पेस गरेको थियो ।

सामान्यतयाः प्रहरीले थुनामा रहेका व्यक्तिलाई इजलासमा पेस गरेपछि फाइल हेरेर थुनाको अनुमति दिने अभ्यास छ ।

जिल्ला अदालतले रविन्द्र र जबरालगायत ११ जनालाई राज्यविरुद्धको कसुर गरेको आरोपमा छ । ३१ जनालाई संगठीत रुपमा आपराधिक उपद्रव गरेको आरोप छ ।